నేడు సీపీఎం పోలిట్‌బ్యూరో కీలక సమావేశం

అత్యున్నత నిర్ణయాత్మక విధాన మండలిగా భావించే 13 మంది సభ్యుల సీపీఎం పోలిట్ బ్యూరో శుక్రవారం భేటీ కానుంది. ఇందులో భారత్-అమెరికా అణు ఒప్పందంపై కేంద్రంలోని యూపీఏ సర్కారుతో ఉన్న సంబంధాలపై కీలకంగా చర్చించనున్నారు. అలాగే సీపీఐ జాతీయ కమిటీ కూడా ఇదే అంశంపై దేశ రాజధాని న్యూఢిల్లీలో సమావేశంకానుంది. ఈ సమావేశాల్లో కమ్యూనిస్టు వృద్ధనేతలైన జ్యోతిబసు, హరికిషన్ సింగ్ సూర్జీత్‌లతో పాటు.. మరికొందరు సీనియర్ నేతలు కూడా హాజరుకావచ్చని ఆ పార్టీ వర్గాలు పేర్కొన్నాయి.
ఇదిలావుండగా.. అణు ఒప్పందంపై వెనక్కి తగ్గేది లేదని తెగేసి చెప్పిన వామపక్షాలు. ఈ అంశంపై పార్లమెంటులో చర్చ జరపాలని పట్టుపట్టే అవకాశం ఉంది. అంతేకాకుండా లెఫ్ట్-యూపీఏ కో-ఆర్డినేషన్ కమిటీ నుంచి వైదొలగే అంశం, అణు ఒప్పందంపై సర్కారు వెనక్కి తగ్గే వరకు మద్దతు ఉపసంహరించుకునే విషయాలపై ఈ సమావేశంలో కీలకంగా చర్చించనున్నారు. ఇప్పటికే కో-ఆర్డినేషన్ కమిటీ నుంచి వైదొలగి, ప్రభుత్వాన్ని పడిపోకుండా చూస్తూ.. వేచి చూసే ధోరణి అవలంభించాలని కొందరు వామపక్ష నేతలు అభిప్రాయపడుతున్నారు.

వెబ్ దునియా తెలుగులో కనిపించే ఆసక్తికరమైన కథనాలను మీరు ఇక్కడ చదవచ్చు. క్లిక్ చెయ్యండి